மழையோடு பேசுங்கள்

அதன் ஒவ்வொரு

தாளத்திலும்

பிடிபடாத ஒரு சொல்

நனைந்தே செல்கிறது.

0

கவனமாக இருங்கள்

மழையோடு பேசும் போது

மழை வந்தாலும்

வந்து விடலாம்

0

மழை வரும் போது

மழையோடு பேசுவதே

நன்று என்கிறீர்களா

அப்படி தான் இருந்து

விட்டு போங்களேன்.

0

மழை பெய்தால் போதும்

விட்டில்கள் வந்து விடுகின்றன

வண்டுகளும் பூச்சிகளும்

வந்து விடுகின்றன

என்றாலும்

இதையெல்லாம் சொல்லாமல்

வெறுமனே

இரண்டு வரி

மழையைப் பற்றி

சொல்லவும் இயலுமோ?

0

மழைநீர் அருவியாய்

வீழ்கிறது

இப்போதெல்லாம்

மழையில் இறங்கி

குளிக்காமல் போன

மனம் வாய்த்ததேன்?

0

நேற்று பெய்த மழையில்

வீட்டின் கூரை

பெயர்ந்து போனது

வீடு நல்ல வெளிச்சமாச்சு

மனசு மெல்ல குளமாச்சு

0

மழை பெய்தால் போதும்

வீட்டில் பல இடங்களிலும்

தண்ணீர் தேங்கி விடுகிறது

மழை மீது புகார் சொல்ல

இயலாத என்னிலும்

உண்டோ கவனபிழைகள்?

மழை விடாமல்
பெய்து கொண்டிருக்கிறது
வீட்டின் கூரையோடுகள்
பல காலத்தால் பழமையானவை
உத்தரத்தில் செதில் பிடித்தாயிற்று
சுவர்கள் நனைந்து
மழைநீர் வழிகிறது
ஒவ்வொரு மழையும்
அச்சத்தையோ
தவிப்பையோ
தான் எழுதிச் செல்லுமோ?

0

இன்றொரு மழை மரங்களை
குளிப்பாட்டிச் சென்றது
செடிகளை நனைத்து
புற்களை ஈரப்படுத்தி
ஆனைந்தத்தையோ
அளவிலாத கருணையையோ
பொழிந்ததன்றோ
இலைகளின் தூய்மை
பூக்களின் பளிசான எடுப்பு
கொம்புகளில் புதுவண்ணம்
கழுவிச் செல்லவும்
உலர செய்யவுமான
மழைத்தாய் தாலாட்டோ தென்றல்

எனக்கு மேலே தொங்கிக் கொண்டிருக்கும்
மின் விசிறி எழுதும்
பேப்பர் பக்கங்களை
எப்போதும்
கலைத்துக்கொண்டிருக்கிறது
எனது எழுத்தையும்
0
மின் விசிறியின் கீழே
அமர்ந்து எழுதுவதென்பது
அவ்வளவு எளிதானதல்ல
என்றபோதும்
அதன் ஓட்டத்தை நிறுத்த
எனக்கில்லை மனது
0
படுத்து கொண்டு மேலே
தொங்கும் மின்விசிறியை
பார்க்கும் போது
ஒன்றுமே
தோன்றுவதில்லை என்ற
குறையை தவிர
அதன் விசிறிகள்  சுழல சுழல
தூக்கம் பீறிட்டு கொண்டு
வருவதென்பது உண்மைதான்
0
மின் விசிறியின்
காற்றில் அதிர்ந்தன
புத்தகத்தின் பக்கங்கள்
ஒரு பக்கத்தை
இன்னொரு பக்கம்
வாசிக்கிறது
0
மின்விசிறியின்
சப்தம் நின்றுபோகுமோ
என்ற கவலை கொள்ளாது
இருக்கமுடிவதில்லை
அதன் இதயம்
கனன்றவாறு
சுழல்கிறது
0
உனது சுற்றலில்
தேடல் என்றொரு சொல்
இல்லாதிருந்தாலும்
இயக்கம் இல்லாமல்
எதுவும் உண்டோ
என்று சொல்லி தான்
சுற்றேன்.

பனித்துளிகளைப் பற்றி
யாரும் அபிப்பிராய
பேதம் கொள்வதில்லை
அதிகாலையின் சங்கமத்தில்
இலையின் நுனியை எட்டி
விடுதலை பெற
எத்தனித்தது ஒரு துளி
விழுந்தது
விடுதலை பெற்றது
இலையா?
பனித்துளியா?
—
2
விழும் நீர் பெருக்கே
நீ ஒரு செயல்வீரம்
எனினும் ஏன்
உன்னிடமும் அடக்குமுறை?
தரையில் சொட்டும்
பைப்  தண்ணீரிலும்
கூட பறக்க
எத்தனிக்கிறது
பறவைக் கூட்டம் ஒன்று
—
3
நடக்கவும் முடியவில்லை
குனியவும் முடியவில்லை
பட்டாம் பூச்சி ஒன்று
தற்செயலாய்
காலில் அமர்ந்த போது
மற்றபடி
பட்டாம் பூச்சியைப் பற்றி
நினைக்க சமயமேது?
—
4
மழைநீர் பெருக்கெடுத்து ஓடுகிறது
எதையெல்லாமோ
அடித்துச் செல்லுகிறது
எதையெல்லாம்
அடித்துச் செல்லுகிறது
என்று ஒரு முறையாவது
கவனித்திருக்க வேண்டும்
நானோ?
மழையோ?
—–

5
கிணற்றடியில்
வாளியை
வைக்க முடியவில்லை
உடனே புளியம்பூ
உதிர்ந்து வாளிக்குள்
விழுந்து விடுகிறது
காற்று அடித்துச் செல்லும்
புளியம்பூக்களைக் குறித்தோ
கிணற்றுக்குள் விழுந்து கிடக்கும்
புளியம்பூக்களைக் குறித்தோ
அல்லது
முற்றம் முழுக்க விரவிக்கிடக்கும்
புளியம்பூக்களை குறித்தோ
கவனிப்பற்றுப் போகிறது
மனசு.

  

1

 

இன்றைய தினம்

நேற்றைய தினத்தின்

தொடர்ச்சியாகவே இருக்கிறது

பிறிதொரு தினமும்

அப்படித்தான்

உறங்கிய போதும்

உறங்காத போதும்

சூரியனும் இருந்தது

நிலவும் இருந்தது

சிலர் சொல்லிக் கொள்கிறார்கள்

ஒரு தினம் வரும்

பிறிதொரு தினம் இல்லா

முடிந்த தினம்

இப்படியாக தான் தினங்கள்

போய்கொண்டிருக்கிறது.

 

2

உன்முகம் மறைய

லிப்ட் அடைத்து

கொண்டாலும்

லிப்ட் திறக்கும் போது

வேறோர் முகம்

நிச்சயமிருக்கும்

உன்முகத்துக்கும்

வேறோர் முகத்துக்கும்

மின்னற் பொழுதே

தூரம்.

 

3

அவன் கவனமாக

கூர்தீட்டிய

கத்தியால்

முகத்தை மழிக்கிறான்

கத்தி வைத்திருக்கும்

அவனை குறித்து

கவனமற்றிருக்க

ஏதேனும் சில

சிந்தனைகள்

உண்டுதானே

நம்மில் பலருக்கும்

 

 

 

  வீட்டின் மேலிருந்த 

ஒரு ஓடு பிளந்திருக்கிறது

இடைவெளியில் சிக்கிக்

கொண்டது வானம்

—

மீனவன்

மீன் பிடிப்பதற்க்காக

வலையை வீசுகிறான்

வலைக்கும்

ஆழத்துக்கும்

இடையில் மீனொன்று

நீந்திச் செல்லுகிறது

—

விமான பயணம்

சுகமானது

சுராஸ்யமானதும் கூட

என்றாலும்

எல்லோரையும்

போலத் தான்

பயணம் செய்கிறது

அச்சம்.

—

நீ

உரத்துச் சொன்னாலும்

மறுத்துச் சொன்னாலும்

சொல் பட்டு

கலைவதில்லை

மேகம்.

—

நீயொரு

நட்சத்ரவாசி

நட்சத்திரங்களுக்கிடையிலல்லாமல்

என் கவிதையில்

வாசம் செய்ய

உனை தூண்டியது எது?

—

வெளிச்சத்தில் உண்டு

ஆயிரம் தீர்க்க ரேகைகள்

என்பதை போன்றதா

உன் ஒரு துளி நிலவு

—

உதிர்ந்து விழுந்த போது

வெளிச்சம் தீய்ந்தது

மரணம் இல்லை என

உரத்துச் சொல்

—

வீடு பற்றிய கனவு

எனக்கும் உண்டு

சிறிதோ

பெரிதோ

ரோட்டோரமோ

துரமோ

நல்லதாய்

நாலு பேர் மெச்சுவதாய்

இருக்க வேண்டும்

கனவிலாவது

வந்து தொலைய

மாட்டேங்குது

அந்த வீடு

—

விண்முட்ட நின்ற

பெருமரத்தின்

கிளைகளிடையே

சிக்கிய

பெருந்துயரோ

நிலா.

—

அமர்ந்து இருப்பதிலும்

தியானம் இருக்க்கிறது

அடிக்கடி கண்களை

மட்டும் சிமிட்டி

எனது யோசனையை

தாறுமாறக்குவதில்

உனக்கேனோ

பெருமை?

—

தூர தூரமாய் இருக்கும்

மலைகள் எனது வெளியை

இல்லாமல் ஆக்கின

காது கொடுத்தால்

நீங்களும் கேட்கலாம்

வானுக்கும் உண்டு

ஆயிரம் புகார்கள்

—

 

 

 

  

நிலவொளியில்

 

மல்லாந்து

படுத்துக்கொண்டு

சுயமைதுனத்தில்

ஆள்கிறான் அவன்

தரையில்

ஆங்காங்கே

விந்து துளிகள்

நிலவொளியாய்

—

நீ பெண்மையை எழுதினாய்

வாசிக்க முடிந்தது

மௌனத்தை எழுதினாய்

வாசிக்க முடிந்தது

என்னொரு நீயை எழுதிய போது

வார்த்தைகள் கலைந்தன

ஒரு சொல் கவிதை.

—

ஒரு பொழுதில்

கடலலை சீறும்

பின் தணியும்

உள்வாங்கும்

எப்போதும்

இப்படியாக தான்

போகுமோ

பொழுது

 

 

 

  

படங்களுக்கு வண்ணம் எழுதுபவனே

 

உன் தூரிகைப்பட்டு வந்துதித்த

சூரியன் வெறுமையாய்

நிற்பதை அறிவாயோ

எக்கணத்தில் நானதை வீட்டுக்கு

கொண்டுவந்தேனோ

கூடடைய விடாமல் நிற்கும்

சூரியனுக்கு பறவைகள் குறித்து

இவ்வளவு அலட்சியம் ஏன்

அவை அப்படியே இருக்கவும்

அசையாமல் இருக்கவும்

வஸ்துக்கள் என்று நினைத்தாயோ

களைத்து போன அந்த

தோணிக்காரனை பார்

சதாகாலமும் துடுப்பையே

பிடித்து கொண்டிருந்தால்

வீடடைய அவனுக்கும் தோன்றாதோ

மேலும்

வீட்டு முற்றத்தில் தானியங்களை

பொறுக்கி தின்னும் கோழியும் குஞ்களையும்

கண்டாயா

அவற்றுக்கும் இல்லையோ பொழுது சாய்தல்

பற்றிய கவலையும்,ஏக்கமும்

பொழுது சாய்ந்தாலும் பொழுது சாயாமல்

அப்படியே வைத்திருக்க

உன் தூரிகையை தூண்டியது எது?

 

 

 

  பதினைந்து வருடமாக 

நானும் பார்த்துகொண்டிருக்கிறேன்

அந்த இற்றுப் போன் கிளையை

ஒடிந்து விழவும் இல்லை

முறித்து எடுக்கவும் இல்லை

பலசமயமும் மனைவி

விறகு எரிக்க இல்லை

என்ற போதும்

அந்த மரத்துக்கு

இற்று போன கிளை

என்னவோ கொள்ளை

அழகு தான்.

—

மழை காலங்களில்

எறும்புகள்

தானியங்களை

இங்கிருந்து அங்கும்

அங்கிருந்து வேறெங்கும்

கொண்டு செல்வதை தவிர்த்து

வேறு வேலை ஏதேனும் வேலை உண்டோ?

—

பூக்களின் வாசத்தை கண்டும்

காணாமலும் போய்க்

கொண்டிருக்கிறது

ஒரு வண்டு

என்னை சமன்குலைய

செய்யும்

உத்தேசத்துடன்

—

மௌனமாய் உதிர்ந்து

விழுந்து கொண்டிருக்கிறது

ஓர் ஆலிலை

கார்டூன் நெட்வொர்க்கில்

டோமுக்கு பயந்து

ஓடும் ஜெர்ரிக்கு

அது பயன்படக் கூடும்

என்பதை தவிர்த்து

வேறென்ன யோசிக்க முடிகிறது

இப்போது?

—

ஆடு கரையும் போது

ஏன் கரைகிறது என்று

நினைக்காமலில்லை

என்றாலும்

கரைந்து விட்டு தான்

போகட்டுமே என்பதான

மனசை போலொரு

மனசா உனக்கு?

—

இரவில் எழுப்பச் சொல்லி

ஒரு நட்சத்திரம்

உறங்கி போனது

நட்சத்திரங்களை பற்றி

யாரும் கவலை

கொள்வதில்லை என்ற போதும்

நடத்திரம் என்றோ

விண்மீன் என்றோ

எப்படி வேண்டுமானாலும்

அழையுங்கள்

ஆனால்

பகற்பொழுதில் காட்டச்சொல்லி

தொந்தரவு தராதீர்

—