மாற்றுச்சொல்லினையாவது

அவனுக்காய் உபயோகியுங்கள்

பையித்தியம் என்பதை தவிர

அவனது ஆடைகளில் படிந்திருக்கும்

கறைகளையாவது

துர்மணத்தையாவது

விமர்சனம் செய்யாமல் விட்டுவிடலாம்

அறுந்த வாரைகட்டி பூட்டியிழுக்கும்

கால்களின் அசமகுறையை பெரிதுபடுத்த வேண்டாம்

கையிடுக்கில் வைத்திருக்கும்

அழுக்கு துணிமூட்டையை பற்றி

ஆராவாரத்துடன் கேள்வி கேட்பதையாவது

தடுத்துநிறுத்துங்கள்

அவன் சாலையோரங்களில்

நின்று வித்தைகாட்டுவதாய் வரும்

புகார்களை தள்ளிவிடலாம்

வீசியெறியப்பட்ட சிகரெட்,பீடித்துண்டுகளை

அவன் புகைத்து விட்டுதான் போகட்டுமே

அவனை குறித்து ஓயாது சொல்லும்

ஒவ்வொரு பேச்சுகளிலும்

அவனின் தரப்பு இல்லாமல்

இருக்கிறது என்பதை புரிந்து கொள்ளுங்கள்

எவ்வொரு நாளிலும் அவன்

காணாமல் போய்விடலாம்

அல்லது மனநல மருத்துவ வாகனத்தில்

கடத்தப்படலாம்

அல்லது வாகன விபத்திலோ

அல்லது ஆளொடுங்கிய பகுதிலோ

மாண்டிருக்கலாம்

அல்லது உங்களின் நிமித்தம்

அவன் பையித்தியமாகியிருக்கலாம்

மேலும் விசேச கவனத்தை எதன்பாலும்

திருப்பும் பொருட்டு உங்களுடனேயே கலந்திருக்கலாம்

கவனம்.அவன் கடவுளாக கூட

வாய்ப்பிருப்பதாக உங்களில் ஒருவன்

ஓயாமல் கத்துகிறதை

நீங்கள் கேட்கிறீர்களா?

நிச்சயமாக மாறுபாடனதொன்றே

பஜாரில் நீங்கள் நுழைந்ததுமே

அன்னியர்களில் ஒருவராய் மாறிவிட்டீர்

பஜாரில் மட்டுமே அன்னியருக்கு

அதிக மரியாதை இருந்தது

பஜாரில் நேர்த்தியாக,வரிசையாக

அமைந்திருந்த கடைகளில்

உற்சாகமான வரவேற்புகளும்

விதவிதமான காட்சிகளும்

காணக்கிடக்கின்றன

விதவிதமான குரல்களில்

ஆழ்ந்திருந்தன எல்லாம்

சுராஸ்யமான விஷயம் என்னவென்றால்

அன்னிய கிரகத்து மனிதர்கள்

வந்து போயிருக்கிற கடைதான்

மனித தலைகள் அங்கு

காட்சிக்கு வைக்கப்பட்டிருந்தன

நிஜமான மனித தலைகள்

இரத்த ஒழுக்கோ,துர்நாற்றமோயின்றி

நயமான விருப்பத்துடன்

ஒழுங்கமைக்கப்பட்டிருந்தன

கண்ணாடி பெட்டிகளில்

சுழன்று கொண்டிருந்த மனித

தலைகள் புன்னகையோடு இருந்ததை

நீங்கள் பார்த்தீர்கள்

மனித தலைகளை ஆர்வமுடன்

வாங்கிச்செல்லும் அன்னிய கிரகத்துவாசிகளை

யாரும் ஆச்சரியமாக பார்க்காத்தும்

விசித்திரமானதுதான்

சில அன்னியகிரகத்துவாசிகள்

ஜந்தாறு தலைகளை சேர்த்து வாங்கினர்

பஜாரை விட்டகன்று

வெளியே வந்தபோது

நீங்கள் உங்கள் தலையை

தொட்டுப் பார்த்ததை எப்படி

வர்ணிக்க இயலும்?

நிச்சயமாக இந்த பயணத்திலிருந்து

மீண்டெழுந்த போது

இருக்கையில் அமர்ந்திருந்தீர்கள்

உங்களை சுற்றி தொழில்நுட்ப கருவிகள்

இயங்கிக்கொண்டிருந்தன

பிந்தலையில் திருகிட்டு

உள்நுழையும் இயந்திரம்

விலகி கழன்றிருந்தது

மாமிசத்தை மொய்க்கும் ஈக்களை குறித்து

கவனம் கொள்வதில்லை

மாமிசத்தை விலைக்கு வாங்குவதற்கு முன்

ஊர்ஜிதம் செய்யப்படுகிற மனத்தடையயல்லா

நிலை ஒரு முறையேனும் வாய்க்க வேண்டும்

மாமிசக்கடையில் வெட்டி தறிக்கும்

மாமிசங்களை மட்டுமே கணக்கிலெடுப்பதால்

எலும்புகளை குறித்த குறை

அப்படியே இருக்கிறது

மாமிசம் வெட்டுபவன் முன்பு

ஆடு போல் நிற்கிற மக்கள்

தங்கள் இயலாமையை

வெளிப்படுத்துவதே இல்லை

எனினும் மாமிசம் குறித்த நல்லெண்ண

புத்தகத்தை புரட்ட தயராக இல்லை

மாமிசத்துக்கும் எலும்புக்கும்

இடையில் வேறுபடுத்தலை விரும்பாத

மாமிச வெட்டிக்கும்,மாமிச பிரியருக்கும்

இடையில் பெயரிடப்படாத பனிப்போர்

இருக்கத்தான் செய்கிறது

மாமிசத்தை வெட்டி துண்டுகளாக்கி

பைக்குள் நுழைத்து கையில் தரும்

வரையிலாவது குறைந்த பட்சம்

பனிப்போர் நிகழ்கிறது

இடையில் நாய்களுக்கான மாமிசம்

வாங்கும் பிரத்யேக முகங்கள்

எப்போதும் அலட்சியமாகவே

மாமிசத்தை அணுகுகின்றன

பிரயேக முகம் என்பதால்

மாமிசம் வெட்டுபவனும் கண்டு கொள்வதில்லை

மாமிச பட்சணிகளும் கண்டு கொள்வதில்லை

எல்லாவற்றிலும் மொய்த்து தீர்கிற

ஈக்கள் இவை யாதொன்றையும்

அறிவதில்லை.

நீராகி போகிறதுன் நினைவின் ஒரு சுழி

அகாலத்திலிருந்து நீளுகிறதுன் கரம்

கழுத்தை இறுக்கி விழியை பிதுக்கிக்

கொள்ள செய்யும் வேகம் அசுரம்

தப்பிக்க வழியின்றி ஓடியலைகிறேன்

காற்றாய் வருகிறாய்

கொடுங்கோலெடுத்து வீசுகிறாய்

மேனியிதுவோ என பதைக்க

ரத்தம் கசிய ஓடி ஒளிகிறேன்

சூரிய மறைவு பிரதேசத்தில்

சட்டென நிலவாய் வந்துதித்து

கொடுங்கனல்களை நிரப்பிவிடுகிறாய்

என் கபாலத்தின் புதரிடுக்கில்

சொற்கள் கசைகளாகி அடித்து தள்ளுகிறது

ஈனக்குரலில் முனங்கி பிசாசின் தோற்றம்

கொண்டு நடுவிரவில் புகுந்து கொண்டேன்

சகல எத்தனிப்புகளையும் தாண்டி

ஆந்தையின் கண்களாக மாறி

அபசுரம் எழுப்புகிறதுன் அடிக்குரல்

ஜந்தாவது குரலில் வெளிப்பட்டு போனேன்

என்னையும் அறியாமல்

வெறும் பிண்டமாய் மயிர்களற்ற சதையுமாய்

மண்ணில் புரள்கிறேன்

மஞ்சள் வெளிச்சமாய் வந்து

மண்ணை புரட்டி விடுகிறாய்

மெல்ல உயிர் கசிந்திர்ருக்க கிளியாக்கி

கொண்டு சென்றாய் உன் காட்டுக்குள்

தூங்கும் அழகிகளின் இல்லத்திற்க்கு

ஒருமுறை சென்றிருந்தேன்

நான் நினைத்ததற்க்கு மாறாக அவர்கள்

தூங்கிக் கொண்டிருந்தார்கள்

நிறைய வாடிக்கையாளர்கள்

கண்விழித்து இருந்தனர்

மெல்லிய கீதம் இசைப்பரப்ப

அறுசுவை உணவுகள் பரிமாறப்பட

வேலைக்காரர்களின் பரப்பரப்புகளுக்கிடையில்

அழகிகள் தூங்கிக்கொண்டிருந்தார்கள்

அவர்களில் பெரும்பான்மையானோர்

ஆடையணிந்திருக்கவில்லை என்பதும்

அவர்களின் முனகும் குரல் கீதயிசையில்

யாருக்கும் கேட்கவில்லை என்பதும்

அநேகமாக நம்பக்கூடிய ஒன்றாகும்

தனித்தனியே அமைக்கப்பட்டிருந்த

படுக்கையறை கட்டில்கள்

காலியாக இருந்தன என்பது

ஆச்சரியமான செய்தியே

சுழல் மின் விசிறிகள்

ஓயாமல் சுழன்றன

சில வாடிக்கையாளர்கள்

உற்சாகமிகுதியில் வாசல்கதவை

தாழிடமறந்து விட்டார்கள் போலும்

மேஜைகளில் தூங்கும் அழகிகள்

யாரும் காணலுறலாம்

வாடிக்கையாளர்கள்

அவர்களது திட்டமிடப்பட்ட

நிர்வாணகோலத்தை கண்டதும்

மகிழ்ச்சியில் குதூகலிக்கின்றனர்

நான் சென்ற அறையின்

தூங்கும் அழகி அநேகமாக

தூக்கத்தின் உச்சத்திலிருந்தாள்

முகத்தில் ஏதொரு சலனமோ

உணர்ச்சியோ இல்லாமல்

கட்டிலில் ஆடையாபரணம் அணிய

நிர்வாணத்தை களைந்திருந்தாள்

அறை கதவுகளை தாழிட்டு

மின்விளக்குகளில் அவளை

காண்பதில் கிலேசம் இல்லாமலில்லை

தூங்கும் அழகிகளோடு இருந்த போது

நான் கண்ட உண்மை விநோதமானது

தூக்கத்தின் மூலம் அவர்கள்

கனவுகளை பெருக்குகிறார்கள்

அந்த கனவுகளில் புகுந்து கொள்ள

யாதுவான திறப்புகள் இருந்தன

கனவினுள் புகுந்து கொண்டதுமே

நறுமண தூபத்தின் புகையில்

அலங்கரிக்கப்பட்டிருந்த ஊர்தியில்

நான் தூங்க தொடங்கினேன்

ஏதோ ஒரு பயணம் மேற்க்கொண்டது

போலிருந்தது அந்த அனுபவம்

மற்றபடி தூங்கும் அழகிகள் யாரையும்

தொந்தரவு செய்யாமல் அவர்தம்பாட்டுக்கு

தூங்கிக்கொண்டிருந்தார்கள்

என்பதுவே அந்த இல்லத்தின்

விசேசமாகவிருந்தது.

மேலும் தூங்கும் அழகிகளிக் இல்லம்

எப்போதும் பரபரப்புடனேயிருந்தது.

சித்திரச்சாலையை சிறைச்சாலையாக்குகிறதுன்
தூரிகையின் சலனங்கள் இன்று
தூரிகை ஒரு கருவி மாத்திரமே
உனது சொல்லோ,எண்ணமோ தான்
அதன் இயலாமையை இலாவகமாக்குகிறது
விரித்து வைக்கப்பட்ட கான்வான்சின்
நாற்புறமும் ஆணிகளை அறைந்து விட்டாய்
அங்கிருந்தே சிறைச்சாலையின் கரு
உற்பத்தியாகுகிறது
சுவரில் சாய்ந்து நிற்க சொல்லி
கைதியின் பின்புறத்தில்
தூரிகையால் ஓவியம் வரைகிறாய்
சித்திர கூடம் உண்மையாகவே
சிறைச்சாலை விதிகளை நிறைவேற்றுகிறது
இங்கே சிறு வித்தியாசம் உள்ளது
நிறங்கள் எடுத்து ஓவியம் பூச தேவையில்லை
தூரிகையால் உடம்பை அறுத்து
வழியும் உதிரத்தை நனைத்தால்
சிவப்பு நிறம் என்று சொல்லி விடலாம்
வளைத்து வளைத்து தூரிகையால்
எழுத எழுத சவுக்கடிதான்
விழுகிறது என்று அவன் கத்தப்போவதில்லை
கான்வாசில் நிற்கும் அவன்
அழப்போவதில்லை என்ற தைரியம்
தூரிகையை கழுவு
அதில் ரத்தம் படிந்திருக்கிறது என்று
சொல்ல யாருமில்லை
ஆயினும் தூரிகையை கழுவி வைப்பதை
ஆயுதசாலை உறை வாளோ,கேடமோ இருக்குமிடம் பார்த்து
வைப்பதால்
தூரிகையை தண்ணிரால் கழுவுகிறாய்
அதை தூரிகை ஜாடியில் வைக்க முயலுகிறாய்
கையோடு தூரிகை சேர
பிரிக்க முடியாத முடிச்சொன்று விழ
உன் ஒரு விரலில் மயிர்க்கற்றை
பதைக்கும் உன் முகம் காண
கான்வாசில் இருந்த அவன்
மெல்ல முகம் திருப்புகிறான்
சித்திர கூடம் சிறைகூடமாகி
சித்திரவதை கூடமாகி விட்டது
இப்போது.

விரைக்கும் உச்சத்தின் அடிவானத்தில்

பதாகையை நீட்டுகிறதென் உயிர்பெருக்கு

அதன் நிழலில் நீர் பருகிடவும்

ஓய்வெடுக்கவும் கனவு சுந்தரிகள்

காத்திருக்கின்றனர்

மணி மண்டபத்தில் அரசாளும்

கட்டளைகளுக்கு தம்மையே அர்பணித்த

விழிகளின் திரையில்

போதை ஊற்றுக்கள் பீறிட்டெழுகின்றன

உடல் வாதைகளை கழற்றி வைத்து

சொப்ன ரூபங்களில் மிதந்தலைகிறார்கள்

அரளிப் பூக்களைப் போல

எரியும் நடு நிசியிலோ மெல்ல

தீமூட்டி அதன் தழல்களில்

உலர வைக்கின்றனர் நெடுநாள் ஆசைகளை

குளிர்காய்ந்து பெய்மறந்து உலாவுகையில்

எனது காமம் உலகங்களுக்கு அப்பால்

பயணிக்க எத்தனிக்கின்றன

யாகம் செய்தோ,மோன தவம் செய்தோ

மீட்டெடுக்கின்றனர் எனதுடலை

அதன் யவ்வன திரட்சி மாறாமலே

நறுமணங்களையும்,தூபங்களையும்

சுழலவிட மெல்ல அசைந்து

உச்சத்தையெட்டுகிறது

மீண்டும் அவர்கள் வருகிறார்கள்

நிர்வாணத்தை நனைத்து உயர

பருந்தென பறந்து போகையில்

கூழாங்கற்களென உருண்டு போகிறது

என் நெடுநாள் குறிகள் யாவும்

உனது கீழ் பாய்தலில்
எனது மேனி நடுங்குகிறது
கழன்று போகிறதென் அகம்
விழும் ஒவ்வொரு சுவடும்
மேதாவி நீயோ
என கேலி செய்கிறது
கண்மூடி நின்றிருக்கிறேன்
இமைதொட்டு
நாபி தொட்டு
நெஞ்சை பிடித்திழுக்கும்
ஒரு பெரும் சலனம்
தேகம் இல்லாதிருந்தால்
கரைந்திருப்பேனோ
இரைச்சல் காதை குடைந்து
கபாலத்தில் நுழைந்து
அறிந்தவற்ரையும்
அறியாதவற்ரையும்
சிதறடித்து விடுகிறது
ஒரு வெறும் ஜடம் போல்
ஆகிவிட்டேன்
உறைந்து போன என்னில்
விடுதலை பெற்றன
ஒரு நூறு பறவைகள்
ஒரே ஒரு சப்தமெழுப்பி

சுருக்கிடப்பட்ட கயிறை நன்றாக
இழுத்து பார்த்துக்கொள்கிறானவன்
நாற்காலி ஒன்றின் மீதேறி
கயிற்றை தலைக்குள் விட்டு
சுருக்கை சரி செய்து கொள்கிறான்
தான் தற்கொலை செய்து கொள்ள
யாரும் காரணமில்லை
என்று எழுத தோன்றியது அவனுக்கு
மேஜையில் பேனாவோ,காகிதமோ
காணவில்லை
பரபரப்பு அடைகிறானவன்
உடனே செய்து முடித்தாகவேண்டும்
கொஞ்சமும் தாமதித்தால்
எல்லாமே வீண்
யாராவது வரக்கூடும்
சமயமும் இல்லை
இனி கதவை திறந்து
காகிதத்தையும்,பேனாவையும்
எடுப்பதற்க்குள்…….
கதவையும் திறக்க வேண்டும்
கதை திறந்தால் நாற்காலி தெரியும்
அவற்றை முதலில் மறைக்க வேண்டும்
எல்லாம் பாழாகி விடுமோ
என்ற பயமும் இப்போது
கயிறை மறைத்து
நாற்காலியை தூரவைத்து
தாழ்பாழை திறக்க போகையில்
கேட்டது அம்மாவின் குரல்
“கதவ மூடிகிட்டு உள்ளே
என்ன பண்றே?”
கதை திறந்த போது
சாவு ஓடிப்போயிற்று.

எனது அவயங்கள் யாவையும் வெட்டி
உங்கள் முன் பரிமாற வைக்கப்பட்டிருக்கிறது
ரத்த வாடை வீசாத மொழுக்கான
தோல்களற்றவையவை
உங்களில் ஒருவன் சொல்லுகிறான்
முன்பும் இதனொரு சுவையை அறிந்தேயிருக்கிறேன்
பாலித்தீன் பைகள் போலிருக்கும்
மேலுறையை பிரித்தெடுத்துவிடுகின்றனர்
அப்போது தான் அந்த சர்ச்சை உருவாகியது
மாமிசங்கள் இல்லாத தலை எதற்கு
நீங்கள் அவயங்களை புசிக்காமலே
வாதிடுகிறீர்
விருந்துகளிலும்,வைபவங்களிலும்
கேட்காத பேச்சாக இருந்தது அது
ஒவ்வொருவரின் தட்டுகளிலும் இருந்த
அவயங்களுக்கு ஒப்ப
அவர்கள் கொலைவெறி தாக்குதல்களில்
அவயங்கள் விழத் தொடங்கின
எனது தலையை தட்டில் வைத்திருந்தவன்
தலையை மிதித்துக் கொண்டு விழுகிறது உடல்
கால்களற்றவன் தவழத்துவங்குகிறான்
கைகள் இரண்டையும் இழந்தவன்
நிலை குலைந்து போயிருந்தான்
ரொம்ப காலத்துக்கு பிறகு நான்
ஒரு விருந்தில் கலந்து கொண்டிருந்தேன்